آدم الشرقاوي يكشف لأول مرة: "كنت بكره نفسي.. والجلطات وصلتني للنقطة صفر"

في ظهور جديد بعد غياب دام قرابة عامين، خرج الفنان الشاب آدم الشرقاوي عن صمته وكشف كواليس غيابه الطويل عن الأضواء، مؤكدًا أنه مرّ بظروف صحية صعبة كادت أن تغيّر مجرى حياته بالكامل، وتسببت في انعزاله عن الجمهور وحتى عن مواقع التواصل الاجتماعي.

آدم، الذي خطف الأنظار من أول ظهور له في مسلسل "لعبة نيوتن"، نشر عبر حسابه الرسمي على "إنستجرام" صورة له، وأرفقها برسالة مؤثرة قال فيها: "كنت مختفي من فترة طويلة، وده مش لأن عندي حاجة أخبيها، لكن لأني كنت بمر بمرحلة صعبة جدًا.. وصلت وزني لـ110 كيلو، ماكنتش قادر أتنفس كويس، جسمي كان منتفخ، ومخي مشوش ومش قادر أفتكر أيام معينة، والمفاصل كانت بتوجعني لدرجة ماكنتش بقدر أقف."

وأضاف آدم بتأثر: "الأصعب من كده إن كان عندي جلطات في رجلي، ومشاكل في الكلى.. وكنت حرفيًا مش طايق نفسي ولا حتى صورتي في المراية. حسيت إني تايه، غريب عن نفسي.. بس دلوقتي الحمد لله، بقيت أحسن من أي وقت فات، وزني رجع لطبيعته، صحتي اتحسنت، والمخ بقى صافي، وكل حاجة رجعت تشتغل زي الأول وأحسن."

وأكد أن رغم الأزمات اللي عاشها، ربنا منحه فرص كتير في حياته، واستغلها لما حالته اتحسّنت، وشكر كل اللي وقفوا جنبه في رحلته، مضيفًا: "أنا ممتن لكل تحدي مرّيت بيه، وكل تجربة خلتني أشوف الحياة من منظور جديد.. ومبسوط إني راجع تاني، ومستعد أشارككم الحاجات اللي كنت بشتغل عليها".

يُذكر أن آدم الشرقاوي نال شهرة واسعة بعد مشاركته في عدة أعمال فنية داخل مصر، أبرزها مسلسل "لعبة نيوتن" وفيلم "شماريخ"، واعتُبر من أبرز الوجوه الشابة الواعدة في الفترة الأخيرة.